संतोष चौगुले

१२५ वाहनांच्या मूळमालकांचा लागला शोध

नारायणगाव पोलीस; गंगामाता वाहन शोध संस्थेचा उपक्रम

पुणे । नारायणगाव पोलीस ठाण्याच्या आवारात १२५ वाहने गुन्ह्यातील व बेवारस अवस्थेत अनेक वर्षांपासून एकाच जागेवर उभे आहेत. त्यामुळे आरोग्याचा धोका निर्माण होण्याची शक्यता नाकारता येत नाही. पोलिसांनी १२५ वाहनांच्या मूळ मालकांना शोधून काढले आहे. बेवारस वाहने ज्या मालकांची आहेत, त्यांनी आपल्या वाहनांची कागदपत्रे दाखवून सात दिवसांत घेऊन जावीत अन्यथा, पोलिसांकडून त्या वाहनांचा लिलाव केला जाईल व पुढील प्रक्रिया पूर्ण करण्यात येईल. त्यातून आलेली रक्कम सरकारी तिजोरीत जमा केली जाईल, अशी माहिती नारायणगाव पोलीस ठाण्याचे सहायक पोलीस निरीक्षक महादेव शेलार यांनी दिली. पोलीस ठाण्यात शेकडो वाहने विविध गुन्ह्यांत पोलीस जप्त करतात. मात्र, न्यायालयीन प्रक्रियेमुळे व बेवारस वाहनांचे मालक मिळून येत नसल्याने ही वाहने पोलीस ठाण्याच्या आवारात अनेक वर्षे मालकांच्या प्रतिक्षेत धूळखात पडून आहेत. या पार्श्वभूमीवर जिल्हा पोलीस अधीक्षक पंकज देशमुख, पुणे ग्रामीण यांनी पुढाकार घेत बेवारस वाहनांच्या मालकांचा शोध घेत ती वाहने त्यांच्या ताब्यात देण्याचे आदेश पोलिसांना दिले. त्यानुसार पुणे ग्रामीणचे अपर पोलीस अधीक्षक रमेश चोपडे, जुन्नर विभाग, उपविभागीय अधिकारी रवींद्र चौधर यांच्या मार्गदर्शनानुसार नारायणगाव पोलिसांनी बेवारस वाहनांच्या मालकांचा शोध घेण्यास सुरुवात केली. त्यासाठी पोलिसांनी परंदवाडी(ता.मावळ,जि.पुणे) येथील गंगामाता वाहन शोध संस्थेची मदत घेतली. या संस्थेचे अध्यक्ष राम उदावंत यांनी नारायणगाव पोलीस ठाण्यात येत बेवारस वाहनांची पाहणी केली. राम उदावंत व पोलिसांनी बेवारस वाहनांचे चासी व इंजीन क्रमांकावरुन १२५ वाहनांच्या मूळ मालकांचा शोध लावला. मूळ मालकांचा शोध लावण्यासाठी सहायक पोलीस निरीक्षक महादेव शेलार, पोलीस उपनिरीक्षक सनिल धनवे, विनोद धुर्वे, जगदेव पाटील, महिला पोलीस हवालदार प्रियंका लोंढे, पोलीस नाईक मंगेश लोखंडे, पोलीस शिपाई शैलेश वाघमारे, काळूराम मासाळकर, सचिन सातपुते यांच्यासह गंगामाता वाहन शोध संस्थेचे अध्यक्ष राम उदावंत, उपाध्यक्ष बाबासाहेब बागडे, भारत वाघ, गोरख नवसुपे यांनी परिश्रम घेतले.