एस.डी चौगुले

८८ वाहनांच्या मूळमालकांचा लागला शोध

अंधेरी एमआयडीसी पोलीस गंगामाता वाहन शोध संस्थेचा उपक्रम

मुंबई -अंधेरी
एमआयडीसी पोलीस ठाण्याच्या आवारात ८८ वाहने गुन्ह्यातील व बेवारस अवस्थेत अनेक वर्षांपासून एकाच जागेवर उभे आहेत. त्यामुळे आरोग्याचा धोका निर्माण होण्याची शक्यता नाकारता येत नाही. पोलिसांनी ८८ वाहनांच्या मूळमालकांना शोधून काढले आहे. बेवारस वाहने ज्या मालकांची आहेत, त्यांनी आपल्या वाहनांची कागदपत्रे दाखवून सात दिवसांत घेऊन जावीत अन्यथा, पोलिसांकडून त्या वाहनांचा लिलाव केला जाईल व पुढील प्रक्रिया पूर्ण करण्यात येईल. त्यातून आलेली रक्कम सरकारी तिजोरीत जमा केली जाईल, अशी माहिती अंधेरी एमआयडीसी पोलीस ठाण्याचे वरिष्ठ पोलीस सतीश गायकवाड यांनी दिली. पोलीस ठाण्यात शेकडो वाहने विविध गुन्ह्यांत पोलीस जप्त करतात. मात्र, न्यायालयीन प्रक्रियेमुळे व बेवारस वाहनांचे मालक मिळून येत नसल्याने ही वाहने पोलीस ठाण्याच्या आवारात अनेक वर्षे मालकांच्या प्रतिक्षेत धूळखात पडून आहेत.या पार्श्वभूमीवर मुंबई पोलीस आयुक्त विवेक फणसाळकर यांनी पुढाकार घेत बेवारस वाहनांच्या मालकांचा शोध घेत ती वाहने त्यांच्या ताब्यात देण्याचे आदेश पोलिसांना दिले. त्यानुसार विशेष पोलीस आयुक्त देवेन भारती, पोलीस सहआयुक्त सत्य नारायण चौधरी (कायदा व सुव्यवस्था), पश्चिम प्रादेशिक विभागाचे अपर पोलीस आयुक्त परमजीत सिंह दहिया, परिमंडळ दहाचे पोलीस उपायुक्त दत्ता नलावडे,अंधेरी विभागाचे सहायक पोलीस आयुक्त शशिकांत भोसले यांच्या मार्गदर्शनानुसार अंधेरी एमआयडीसी पोलिसांनी बेवारस वाहनांच्या मालकांचा शोध घेण्यास सुरुवात केली. त्यासाठी पोलिसांनी परंदवाडी (ता. मावळ, जि. पुणे) येथील गंगामाता वाहन शोध संस्थेची मदत घेतली.या संस्थेचे अध्यक्ष राम उदावंत यांनी अंधेरी एमआयडीसी पोलीस ठाण्यात येत बेवारस अवस्थेत असलेल्या वाहनांची पाहणी केली. राम उदावंत व
पोलिसांनी बेवारस वाहनांचे चासी व इंजीन क्रमांकावरुन ८८ वाहनांच्या मूळ मालकांचा शोध लावला. मूळ मालकांचा शोध लावण्यासाठी वरिष्ठ पोलीस निरीक्षक सतीश गायकवाड, पोलीस निरीक्षक प्रतापराव कदम, प्रशासन पोलीस हवालदार प्रवीण पवार, सहायक पोलीस निरीक्षक अनिल माळी, श्रीराम पवार, संगीता बोर्डे, सचिन गुरव, विकास खाडे, भरत शिंदे यांच्यासह गंगामाता वाहन शोध संस्थेचे अध्यक्ष राम उदावंत, उपाध्यक्ष बाबासाहेब बागडे यांनी परिश्रम घेतले.